إيه المطلوب منك؟
لو اللي منك ضدك؟
مطلوب منك....
متتوجعش ولا يبان عليك
إنك زعلان....
مطلوب منك..
.تضحك وتسمع
وتهوِن علي نفسك كمان
.وتراضي وتصالح
وانت خلصان
مفيش فيك حيل تتكلم.
مفيش فرصة تتألم
مطلوب منك....
تبقي ضهر وسند وتبان
انك مكتفي من كل شئ
وانت من جواك تعبان.
مطلوب منك ...
تقول اللي تحب تسمعه .
تنصح بحنية وكل ودية
وانت من أسوتهم مليان
مطلوب منك..
تريح الي قدامك بالكلام.
تهدهِد علي كل إنسان
و انت مش مهم
إنت في نظرك الغلبان
عايز ترتاح ليه ؟
وانت عودتهم يمارسوا عليك الخِذلان ....
ولما تحتاجهم ماتلاقي
غير كل أسوة
واستخسروا فيك الحنان
يجرحوك منغير رحمة
وينتزعوا منك الأمان.
...
عارف الحل إيه؟
تكَّسَر كل اللي جواك
عيش مع نفسك.. وحب هواك
وكفاياك... بقى .....كفاياك
استنيتهم كتير ..
جه وقت اللي سابك... يستناك
خلي إرادتك قبل هواك
وارمي كل الكون وراك
إبعد عن اللي خذلك
ومقدرش طيبتك وصبرك
إبعد عن اللي شافك تايه
وموقفش يوجهك ويرعاك
إهزم حزن أيامك... لا تصبح هلاك
غَيَّر ملامح كل وش أذاك
واوعاك ...تكتب تاني شكواك
إوعاك..
دي الشكوى لغير الله مزلة
وخليها يالا علي الله
وحده ينصرك ويرعاك
وأمسك ريشة أحلامك
وارسم لوحة أيامك
رضى وابتسامة مفيهاش الآه
مطلوب منك بس في الحياه
يادوب كام كلمة
إعمل.... واجتهد
إفرح.... ..تنسعِد
هتِعلى وتكبر ...بفضل الله
مطلوب منك ببساطة ..
إنك.... متقولش ...تاني لحد الآه
إيه مطلوب منك؟
بقلمي... إنتصار حسين
ليست هناك تعليقات:
إرسال تعليق