لما عيونك تهرب
===========
. . محمد عسكر
لما عيونك تهرب مني
يبقى الحزن بسرعه يجيني
أصل عيونك زي الجني
لما تشوفني قوام تلاغينى
..
فيها الصمت وأحلى كلام
علي شطآن البسمه الحايره
ياخد قلبي للأحلام
و ابقى معاك ف نفس الدايره
.
فوق السطر بحور تتغزل
فوق السطر المطر بينزل
فوق السطر جيوش إلهام
ليه النبض الغافي اتزلزل
فوق السطر ولسه أنا نايم
ليه يا حياتي بتصحيني
.
لما اصحيت من غفلة ذاتي
رحت ادور على كتباتي
كل حروف الشوق رسمتني
لحن حزين ف قلب ناياتي
.
تنفخ فيه الروح أشواقي
وافضل اعافر فيه الباقي
لكن انتي زي ما انتى
مش ميّاله لقلبي الساقي
.
ليه مربوط انا تحت غماك
زي التور الداير دور
يملي يفرغ يروى ظماك
عمره ما جاله الوِرد ف دوره
.
أنا يا عيونك مش راح ألومك
ولا ألوم نفسي.. ولا أخونك
لكن فيه الصمت ..هسافر
لاني يا روحي أنا مجنونك
===============
#طوفان
ليست هناك تعليقات:
إرسال تعليق